Aeroporti i Malpensas në Itali është emëruar zyrtarisht “Silvio Berlusconi”, në nderim të ish-kryeministrit italian dhe themeluesit të Mediaset.
Ceremonia e inaugurimit të emrit të ri u zhvillua mëngjesin e së premtes, në aeroportin e Vareses, në prani të familjarëve të Berlusconit, si dhe figurave të larta politike dhe institucionale italiane.
Në ceremoni ishte e pranishme vajza e tij, Marina Berlusconi, e cila u shpreh e emocionuar dhe krenare që aeroporti, i cili çdo ditë pret mijëra udhëtarë nga e gjithë bota, do të mbajë emrin e të atit.
Marina e përshkroi Berlusconin si një njeri që “gjithmonë kërkonte dialogun me të gjithë”.
Në emër të familjes foli edhe vëllai i tij, Paolo Berlusconi, i cili e cilësoi aeroportin si një portë drejt Evropës dhe botës. Sipas tij, vendosja e emrit të Silvio Berlusconit është një mënyrë për të ruajtur kujtimin dhe trashëgiminë e tij.
“Sot Silvio nuk është më, por është më i gjallë se kurrë”, u shpreh Paolo Berlusconi, duke iu referuar rolit që ish-kryeministri pati në biznes, sport, media dhe politikë.
Në ceremoninë zyrtare morën pjesë edhe presidenti i Senatit, Ignazio La Russa, presidenti i Lombardisë, Attilio Fontana, si dhe zëvendëskryeministri Matteo Salvini.
Salvini e cilësoi Berlusconin si një nga sipërmarrësit më të mëdhenj në historinë politike italiane dhe argumentoi se emërtimi i aeroportit nuk përbën një akt partiak, por një njohje të rolit të tij.
Ndërkohë, emërtimi i aeroportit është shoqëruar edhe me polemika politike.
Kryebashkiaku i Milanos, Giuseppe Sala, nuk mori pjesë në ceremoni.
Salvini shprehu keqardhje për mungesën e tij, ndërsa Sala deklaroi se kishte kundërshtuar vendimin për emërtimin e aeroportit dhe se prania e tij në ceremoni do të binte ndesh me qëndrimin që kishte mbajtur.
Reagim pati edhe nga Marta Fascina, ish-partnerja e Berlusconit dhe deputete e Forza Italia-s. Përmes një postimi në Instagram, ajo shkroi se nga tani, sa herë një udhëtar të niset nga aeroporti “Silvio Berlusconi” dhe të ngrihet në qiell, ish-kryeministri do të jetë aty për ta shoqëruar.
Fascina iu drejtua edhe kritikëve të Berlusconit, duke deklaruar se ata do të vazhdojnë të shohin madhështinë e tij.
