Achraf Hakimi do të përballet me gjyq në Francë pas akuzës për përdhunim që lidhet me një ngjarje të vitit 2023. Gjykata më e lartë franceze ka rrëzuar ankesën e avokatëve të mbrojtësit të PSG-së, duke lënë në fuqi vendimin që çështja të kalojë për gjykim.
Futbollisti maroken akuzohet nga një grua e re për një ngjarje që dyshohet se ka ndodhur në banesën e tij në Boulogne-Billancourt, pranë Parisit. Hakimi i ka mohuar vazhdimisht akuzat dhe ka mbrojtur versionin se kontakti mes tyre ka qenë konsensual.
Pas vendimit të fundit, 27-vjeçari nuk ka më një mundësi tjetër ankimi për të shmangur gjykimin. Procesi pritet të zhvillohet në Hauts-de-Seine, me gjasë në Nanterre, por ende nuk është përcaktuar një datë.
Në këtë çështje mund të përfshihet si dëshmitar edhe Kylian Mbappé, i cili ishte shok skuadre me Hakimin te PSG. Francezi ishte marrë në pyetje gjatë hetimeve pasi kishte biseduar me Hakimin natën e ngjarjes, ndërsa mbrojtja e ka përdorur dëshminë e tij në argumentet e saj.
Avokatja e denoncueses ka deklaruar se klientja e saj do ta vazhdojë betejën ligjore deri në fund. Hakimi, ndërkohë, vazhdon t’i mohojë akuzat. Vendimi për ta dërguar çështjen në gjyq nuk përbën shpallje fajësie dhe përgjegjësia penale do të përcaktohet nga gjykata.
