Lamine Yamal ka folur sërish për garën e Topit të Artë, duke shpjeguar se arsyeja kryesore pse e konsideron veten një kandidat të fortë nuk lidhet vetëm me golat apo statistikat.
“Unë dal në fushë, kënaqem, luaj mirë dhe luaj në mënyrën time. Për fat kam fituar edhe shumë trofe me Barcelonën dhe, mbi të gjitha, Botërorin me kombëtaren. Por stili im i lojës është forca ime më e madhe, është ajo që më bën ndryshe”, deklaroi 19-vjeçari për “L’Equipe”.
Sipas Lamine, Topi i Artë nuk duhet të përcaktohet thjesht nga numri i golave. “Është një çmim që vlerëson lojtarin më të mirë të vitit, atë që është i jashtëzakonshëm. Kur mendoj për Topin e Artë, më vijnë në mendje Messi dhe Ronaldinho. Ishin lojtarë ndryshe, që të bënin të buzëqeshje kur i shihje.”
Ylli i Barcelonës theksoi gjithashtu rëndësinë e suksesit kolektiv. Për të, një futbollist i madh duhet të ndikojë drejtpërdrejt që skuadra e tij të fitojë. “Kur skuadra fiton, të gjithë duken më mirë dhe shkëlqejnë më shumë”, shtoi ai.
Lamine e konsideron veten një kandidat të fortë edhe për shkak të trofeve të fituar me Barcelonën dhe Spanjën. Nga ana tjetër, edhe Luis de la Fuente ka kërkuar që këtë vit Topi i Artë të shkojë te një futbollist spanjoll, duke argumentuar se lojtarët e tij e kanë merituar njohjen pas sukseseve të fundit.
