Kryeministri Edi Rama ka publikuar pjesë nga diskutimet e zhvilluara gjatë takimit të djeshëm për ecurinë e nismës “Prania Besnike”, proces që zhvillohet çdo të premte në orën 17:00 në të gjithë vendin.
Gjatë takimit, përfaqësues të qeverisë dhe deputetë raportuan mbi numrin e dëgjesave, ankesat e mbledhura dhe problematikat e evidentuara në qarqe të ndryshme.
Sipas të dhënave të paraqitura gjatë takimit, në javën e dytë janë zhvilluar 149 dëgjesa, nga 80 që ishin zhvilluar në javën e parë. Në total, në disa qarqe janë evidentuar qindra ankesa, kryesisht për çështje individuale.
Belinda Balluku raportoi se numri total i ankesave ka arritur në 431, ndërsa theksoi se synimi është rritja e numrit të rasteve të zgjidhura gjatë javës së ardhshme.
Në Korçë, Niko Peleshi raportoi për 263 raste në total, ndërsa në Vlorë Bledi Çuçi bëri të ditur se janë regjistruar 179 ankesa. Në Fier, sipas Enea Karakaçit, gjatë dy javëve janë mbledhur 172 ankesa.
Pjesë nga diskutimet:
Blendi Klosi: Është për tu shënuar që në javën e dytë dëgjesat janë rritur me mbi 50%. Nga 80 që kanë qenë në javën e parë, tashmë janë 149 të tilla, duke shënuar rritje.
Niko Peleshi: Bashkia Korçë nga 263 në total, ka 118 raste. 45% lidhen me Bashkinë Korçë si territor. 85 nga Pogradevi dhe 57 raste nga Kolonja. Procesi po funksionon dhe ka fituar kredibilitet.
Taulant Balla: Në Kamëz është përmbyllur procesi i rindërtimit me 1200 përfitues.
Belinda Balluku: Të gjitha ankesat në total janë 431. I kemi vendosur vetes një qëllimqë të rrisim numrin e ankesave të zgjidhura në javën e ardhshme.
Ulsi Manja: 38 ankesa kanë ardhur në këtë javë të dytë, 100% të rasteve për të dyja këto të premte janë referuar për zgjidhje nga deputetët.
Ogerta Manastirliu: Jemi takuar me mbi 1200 pjesëmarrës. Është një proces që po ecën mirë, pjesëmarrja po rritet nga java në javë për çështjet individuale, por edhe për pjesën e komunitetit.
Enea Karakaçi: Në dy javë janë mbajtur 172 ankesa, janë më shumë të natyrës individuale, njerëzit e kanë pritur shumë mirë.
Bledi Çuçi: Në Vlorë kanë mbërritur 179 ankesa gjithsej. E-mailet që vijnë nga deputetët duhet të ketë prioritet maksimal.
Arbjan Mazniku: Sistemi tani është plotësisht funksional, janë çuar të gjitha e-mailet në të gjitha institucionet, 31 prej tyre kanë marrë përgjigje.
Mirela Kumbaro: Mendoj që problematika të njëjta të qarqeve të ndryshme t’i bashkojmë dhe t’i kategorizojmë me një lloj prioriteti.
Ervin Demo: Dy-tre javët që kemi para do të jenë kritike për të konsoliduar pastaj një gjë që të jetë sa më funksionale.
Edi Rama: Nuk është ideja thjesht që ne të marrim halle e të çojmë halle. Këtu ideja është që ky proces të vijojë sa më mirë. Të vazhdojmë sipas objektivave dhe sipas planeve.
