Vendimi i Gjykatës Speciale, që dënoi me 81 vite burg ish-krerët e Ushtrisë Çlirimtare të Kosovës, ka gëzuar Serbinë.
Zëvendëskryeministri dhe ministri në detyrë i Punëve të Brendshme të Serbisë, Ivica Daçiç, ka qenë i pari që ka reaguar publikisht.
Ai e ka cilësuar vendimin si konfirmim të pretendimeve të Serbisë për UÇK-në, e cila sipas tij ishte “organizatë kriminale dhe terroriste”. Sipas Daçiç, udhëheqësit e lartë politikë dhe ushtarakë të ushtrisë çlirimtare ishin përgjegjës për krime gjatë luftës në Kosovë.
Por duket se ai nuk është plotësisht i kënaqur, pasi Gjykata Sepciale rrëzoi akuzat për krime kundër njerëzimit. Daçiç kritikoi pikërisht këtë vendim, duke e cilësuar atë si “manovër politike” dhe duke pretenduar s minimizon vuajtjet e viktimave serbe. Ai tha se as dënimet e shqiptuara nuk janë të mjaftueshme për familjet e viktimave.
Nga ana tjetër, presidenti Aleksandar Vuçiç ka paralajmëruar se do të ndalë në konferencë shtypi, në orën 18:30, pikërisht për t’iu adresuar popullit serb mbi dënimin e ish-krerëve të Ushtrisë Çlirimtare të Kosovës.
Ish-presidenti i Kosovës, Hashim Thaçi, është shpallur fajtor për krime lufte dhe është dënuar me 25 vjet burgim nga Dhomat e Specializuara në Hagë. Trupi gjykues e shpalli atë penalisht përgjegjës për krime që përfshijnë vrasje, torturë, trajtim mizor dhe ndalim të paligjshëm, të kryera gjatë luftës në Kosovë.
Edhe Jakup Krasniqi u shpall fajtor për krime lufte, përfshirë ndalim arbitrar, trajtim mizor, torturë dhe vrasje të paligjshme. Gjykata e dënoi Krasiqin me 25 vite burg.
Kadri Veseli është dënuar me 18 vjet burgim nga Dhomat e Specializuara në Hagë.
Trupi gjykues e shpalli Veselin fajtor për krime lufte, përfshirë ndalimin e paligjshëm ose arbitrar, trajtimin mizor, torturën dhe vrasjen e paligjshme.
Rexhep Selimi është dënuar me 13 vjet burgim nga Dhomat e Specializuara në Hagë.
Trupi gjykues e shpalli Selimin fajtor për krime lufte, përfshirë trajtimin mizor, torturën dhe vrasjen e paligjshme.
