Presidentja e Kosovës, Vjosa Osmani, hodhi votën e saj në një nga qendrat e votimit në Prishtinë. Pasi qëndroi në radhë për disa minuta, ajo u bëri thirrje qytetarëve të marrin pjesë në zgjedhje, duke theksuar rëndësinë e votës për të ardhmen e vendit.
“Faleminderit që pritët bashkë me mua, derisa më erdhi radha të votoj në këtë ditë të rëndësishme. Kosova është vendi më i zhvilluar në rajonin tonë. Është ditë vendimtare që të gjithë qytetarët të japin kontributin e tyre, duke marrë pjesë në një proces, nga i cili zgjidhet parlamenti dhe ka rëndësi në jetën e të gjithëve.
Është ditë e mirë me diell, besoj është më e lehtë të votohet. I uroj suksese të gjithë atyre që kandidojnë në këto zgjedhje, shpresoj që e mbara t’i prijë Kosovës”, u shpreh Osmani.
Ajo shprehu gjithashtu mbështetje për të gjithë kandidatët, veçanërisht ata të rinj, duke uruar një garë të ndershme dhe një rezultat që do të çojë Kosovën drejt progresit.
