Arsenali është pranë finalizimit të marrëveshjes së re me Mikel Artetën. Bisedimet mes palëve kanë avancuar ndjeshëm dhe në klub ka besim të plotë se trajneri spanjoll do të vazhdojë aventurën në “Emirates”.
Arteta e ka bërë të qartë prej kohësh dëshirën për të qëndruar. “Vullneti im është të jem këtu dhe jam shumë i lumtur. Ndjesia që marr nga klubi është e njëjtë”, deklaroi ai muajin e kaluar.
Kontrata aktuale e 44-vjeçarit skadon pas nëntë muajsh, ndërsa marrëveshja e re pritet t’i sjellë një rritje të ndjeshme page. Aktualisht Arteta përfiton rreth 10 milionë paund në sezon, plus 5 milionë të tjera në rast kualifikimi në Champions League.
Që prej ardhjes në dhjetor të vitit 2019, Arteta e ka transformuar Arsenalin, duke e rikthyer në elitën europiane dhe duke fituar Premier League sezonin e kaluar pas 22 vitesh pritje.
Roli i tij në klub është bërë gjithnjë e më i rëndësishëm. Arteta ka ndikim të drejtpërdrejtë në ndërtimin e skuadrës dhe ishte personalisht i përfshirë edhe në tentativat e fundit për Julián Álvarez dhe Vinicius Junior.
Me marrëveshjen e re, Arteta pritet të afrohet me një dekadë në krye të Arsenalit, ndërsa klubi synon të vazhdojë projektin afatgjatë me trajnerin që konsiderohet figura kryesore sportive në “Emirates”.
