Sarandë – Një ngjarje e rëndë e regjistruar në ambientet e Komisariatit të Policisë Sarandë ka sjellë masat e para ndaj tre punonjësve të policisë, ndërsa Agjencia e Mbikëqyrjes Policore (AMP) ka nisur hetimet për zbardhjen e plotë të rrethanave të incidentit.
Në kuadër të hetimit, është vendosur pezullimi nga detyra i tre punonjësve të patrullës, Armando Bizhga, Dhimitër Gugu dhe Leons Cani, të dyshuar për veprime arbitrare në kundërshtim me detyrën.
Sipas të dhënave të deritanishme nga hetimi i AMP-së, ngjarja ka nisur gjatë orëve të mesnatës, pas një konflikti fizik mes personave që ndodheshin në dhomat e shoqërimit të Komisariatit të Sarandës.
Tre punonjësit e policisë kanë ndërhyrë për të vendosur situatën nën kontroll, por përplasja më pas është përshkallëzuar. Gjatë incidentit, një prej efektivëve është mbajtur nga personat që ndodheshin në ambientet e shoqërimit për disa orë.
Situata është normalizuar pas ndërhyrjes së Forcave të Ndërhyrjes së Shpejtë të Fierit, të cilat kanë mbërritur në Komisariatin e Sarandës. Efektivi i policisë është liruar në orët e para të mëngjesit.
Për ngjarjen është vënë në dijeni edhe drejtuesi i Policisë, Skënder Hitaj, ndërsa AMP Vlorë vijon hetimet për të përcaktuar përgjegjësitë individuale të punonjësve të policisë dhe personave të tjerë të përfshirë.
Ngjarja ishte bërë publike fillimisht nga avokati Arben Llangozi, i cili kishte ngritur akuza lidhur me rrethanat e incidentit.
Hetimi vijon për të rindërtuar të gjithë dinamikën e ngjarjes dhe për të përcaktuar nëse ka persona të tjerë që mund të mbajnë përgjegjësi.
