Çmimet e ushqimeve vijuan të rriten edhe gjatë muajit gusht, ndonëse me ritëm më të ngadaltë se një muaj më parë. Në total, grupi “Ushqime dhe pije joalkoolike” u shtrenjtua me 2.8% në bazë vjetore, nga 3.5% që ishte rritja në korrik.
Pavarësisht ngadalësimit, ushqimet mbetën faktori me ndikimin më të madh në inflacionin e përgjithshëm. Sipas INSTAT, ky grup kontribuoi me 0.95 pikë përqindje në normën vjetore të inflacionit prej 3.2% në gusht.
Rritja më e fortë brenda shportës ushqimore vijon të regjistrohet te peshku dhe produktet e tjera të detit, çmimet e të cilave ishin 9.8% më të larta se në gushtin e vitit të kaluar. Ritmi i shtrenjtimit u përshpejtua lehtë krahasuar me korrikun, kur rritja vjetore ishte 9.4%.
Pas peshkut renditen perimet, zhardhokët dhe bishtajoret, të cilat kushtuan 8% më shumë se një vit më parë. Megjithatë, në këtë kategori shihet një ngadalësim i ndjeshëm krahasuar me korrikun, kur çmimet ishin rritur me 10.1% në bazë vjetore.
Edhe mishi vijoi të kushtojë më shumë. Çmimet e kafshëve të gjalla, mishit dhe produkteve të tjera nga kafshët tokësore u rritën me 3.6%, ndërsa vetëm mishi i freskët, i ftohur ose i ngrirë ishte 4.3% më i shtrenjtë se një vit më parë. Në korrik, rritja për këtë të fundit ishte 4.6%, duke treguar një zbutje të lehtë të ritmit.
Rritje çmimesh u regjistrua edhe te një sërë produktesh të tjera të konsumit të përditshëm. Pijet joalkoolike u shtrenjtuan me 3%, vajrat dhe yndyrnat me 2.8%, ndërsa qumështi, produktet e bulmetit dhe vezët me 2.5%. Krahasuar me korrikun, ritmi i rritjes është ngadalësuar te pijet joalkoolike dhe produktet e bulmetit, ndërsa është përshpejtuar lehtë te vajrat dhe yndyrnat.
Ndërkohë, sheqeri, ëmbëlsirat dhe produktet e pastiçerisë kushtuan 2.7% më shumë se një vit më parë, nga 2.2% në korrik, ndërsa ushqimet e gatshme dhe produktet e tjera ushqimore u shtrenjtuan me 1.7%.
Frutat vijojnë të bëjnë përjashtim nga tendenca e përgjithshme. Çmimet e frutave të freskëta dhe të thata ishin 4.2% më të ulëta se në gushtin e vitit të kaluar, duke thelluar rënien nga 3% që ishte regjistruar në korrik.
Pamja e gushtit tregon kështu një zbutje të inflacionit të ushqimeve, por jo një zhdukje të presioneve brenda shportës. Peshku është kthyer në kategorinë me shtrenjtimin më të fortë, pranë nivelit 10%, ndërsa perimet, ndonëse janë larguar nga ritmet dyshifrore të korrikut, vazhdojnë të kushtojnë ndjeshëm më shumë se një vit më parë./Scan.tv
