I dërguari i posaçëm i SHBA-së, Steve Witkoff, dhe Jared Kushner, dhëndri i presidentit Donald Trump, kanë mbërritur në Moskë, ku pritet të zhvillojnë bisedime për përfundimin e luftës në Ukrainë.
Dy zyrtarët amerikanë u pritën në Moskë nga i dërguari i presidentit rus Vladimir Putin, Kirill Dmitriev, dhe më pas një autokolonë që i transportonte u nis drejt qytetit.
Vizita zhvillohet në kuadër të përpjekjeve të administratës Trump për të ndërmjetësuar një marrëveshje paqeje mes Moskës dhe Kievit. Trump tha një ditë më parë se SHBA-ja kishte një propozim konkret të ri për t’i dhënë fund luftës, pa dhënë detaje.
Presidenti ukrainas Volodymyr Zelensky ka bërë të ditur se Witkoff dhe Kushner pritet të udhëtojnë drejt Ukrainës të dielën, pas vizitës në Moskë.
