Dy ditë pasi Shoqata e Transportit Urban njoftoi duke filluar nga 1 shtatori në Tiranë do të ulej me 30% numri i autobusëve, duket se është gjetur një zgjidhje e përkohshme për situatën e krijuar.
Mediat raportojnë se Ministritë e Infrastrukturës dhe Ekonomisë, i kanë dërguar një mesazh Shoqatës së Transportit, ku i bëjnë me dije se do të marrin një subvencion për një periudhë tre mujore.
Pas marrjes së këtij lajmit, pritet që situata të rikthehet në normalitet dhe shërbimi i transportit urban në kryeqytet të rikthehet në kapacitet të plotë.
Kujtojmë që ditën e djeshme, kryetari i Shoqatës Kombëtare të Transportit Ndërqytetas, Kostandin Foni i bëri thirrje qeverisë që të marrë masa dhe të pranojë kërkesat e tyre. Foni kërcënoi se nëse plotësohen kërkesat e shoqatës që ai drejton, do të ulë deri në 50% numrin e autobusëve.
“Në rast se nuk reagojmë për një 1 javë, operatorët janë të detyruar të ulin në 40 apo 50 përqind në mënyrë që të mos shkojnë drejt degradimit dhe mbylljes.”, u shpreh ai.
Por pas vendimit të sotëm, duket se situata do të rikthehet në normalitet për disa kohë. Ulja e numrit të autobusëve të transportit publik ka një ndikim të drejtpërdrejtë mbi qytetarët, të cilët janë përballur me autobusë të tej mbushur dy ditët e para të shtatorit.
