Ekipet e shpëtimit vijojnë përpjekjet për gjetjen e mijëra personave të zhdukur dhe nxjerrjen e të mbijetuarve nga zonat e goditura nga përmbytjet katastrofike në kufirin mes Nepalit dhe Kinës.
Tre ditë pas fatkeqësisë natyrore, bilanci i përkohshëm i viktimave ka shkuar në 633 persona, prej të cilëve 626 në Nepal dhe 7 në Kinë. Shifrat pritet të ndryshojnë, ndërsa operacionet e kërkim-shpëtimit vijojnë në zonat e prekura.
Autoritetet raportojnë se në Nepal rezultojnë të zhdukur 2,326 persona, mes tyre 517 shtetas të huaj. Në Kinë, numri i të zhdukurve raportohet në 554 persona, prej të cilëve 260 janë të huaj.
Një prej zonave më të goditura është ajo pranë hidrocentralit Trishuli 3A, në kufirin mes dy vendeve. Organizata e menaxhimit të fatkeqësive në Nepal ka përfshirë në listën e të zhdukurve 933 punonjës të hidrocentralit.
Raportohet se disa persona janë gjetur të gjallë, por të bllokuar brenda tuneleve të impiantit. Ekipet e shpëtimit po përpiqen t’i nxjerrin, por kushtet e vështira dhe terreni i dëmtuar nuk po lejojnë identifikimin e hyrjeve të tuneleve.
Sipas Kryqit të Kuq, deri në 93 mijë të mbijetuar janë prekur nga katastrofa dhe kanë nevojë për ndihmë.
Shpresat për gjetjen e të mbijetuarve po zvogëlohen me kalimin e kohës, ndërsa ekipet e shpëtimit përballen me kushte jashtëzakonisht të vështira për të arritur në zonat e prekura.
Dëmtimi i rrugëve dhe infrastruktures ka vështirësuar transportin e ujit të pijshëm dhe furnizimeve bazë për banorët e mbijetuar.
Në anën tjetër të kufirit, në Tibet, operacionet e kërkim-shpëtimit po pengohen nga reshjet, bllokimi i rrugëve, terreni i vështirë dhe rreziku i përmbytjeve të reja.
Zona e katastrofës në Tibet është e mbyllur për gazetarët e huaj. Për pasojë, informacionet nga terreni vijnë kryesisht përmes mediave shtetërore kineze.
Rreziku i një katastrofe të re
Përveç bilancit tragjik të viktimave dhe të zhdukurve, autoritetet përballen edhe me një tjetër kërcënim serioz.
Në Tibet dhe Nepal, rrjedhat masive të akullit dhe baltës kanë shkaktuar formimin e liqeneve të mëdha, të cilat rrezikojnë të dalin nga shtrati ose të çahen.
Një zhvillim i tillë mund të shkaktojë përmbytje të reja dhe të rrezikojë më tej zonat e banuara, por edhe operacionet e kërkim-shpëtimit dhe të ndihmës humanitare që po zhvillohen aktualisht.
