Një gjykatë federale në Shtetet e Bashkuara ka rrëzuar politikën e administratës së Presidentit Donald Trump, e cila pezullonte lëshimin e vizave imigruese për shtetasit e 75 vendeve, mes tyre edhe Shqipëria.
Vendimi është marrë nga gjyqtarja federale Jeannette A. Vargas në Manhattan, e cila e cilësoi politikën në fjalë si në kundërshtim me ligjin dhe përtej kompetencave që legjislacioni amerikan i jep Sekretarit të Shtetit. Kutjojmë se masa në fjalë ishte vendosur nga Departamenti amerikan i Shtetit në janar dhe prekte shtetas nga 75 vende të botës, sipas saj pezulloheshin lëshimi i vizave imigruese, pra vizave për personat të cilët synojnë të vendosen përgjithmonë në Shtetet e Bashkuara. Kufizimi nuk përfshinte kategori të tilla si vizat turistike apo studentore.
Administrata amerikane e kishte argumentuar vendimin me pretendimin se shtetasit e vendeve të përfshira paraqisnin rrezik më të lartë për t’u kthyer në një “barrë publike”, duke përfituar nga burimet dhe programet e ndihmës shtetërore në SHBA.
Vendimi përbën një goditje të rëndësishme për një prej masave të administratës Trump për kufizimin e emigracionit të ligjshëm drejt Shteteve të Bashkuara.
