Një zjarr i përmasave të mëdha ka përfshirë zonën mbi fshatin Dukat, në Vlorë, teksa dyshimet paraprake janë që flakët të jenë shkaktuar qëllimisht.
Zjarri u shfaq rreth orës 19:00 të mbrëmjes së djeshme, fillimisht në katër vatra, ndërsa gjatë natës flakët janë përhapur në një sipërfaqe të konsiderueshme në drejtim të malit të Çikës. Rreth orës 04:00 të mëngjesit, forcat zjarrfikëse kanë mbërritur në vendin e ngjarjes dhe kanë nisur punën e menjëhershme për izolimin e vatrave. Në operacion mësohet të jenë angazhuar edhe rreth 40 efektivë të Forcave të Armatosura, nën drejtimin e strukturave të Emergjencave Civile.
Përmasat e zjarrit duken të mëdha, ndërsa flakët vijojnë të përhapen në terrenin malor. Operacioni i shuarjes paraqet vështirësi për shkak të terrenit të thyer dhe pritet të zgjasë për disa orë. Fatmirësisht aktuialisht era nuk është e fortë dhe kushtet atmosferike nuk po favorizojnë përhapjen e shpejtë të flakëve. Krahas ndërhyrjes nga toka, ka nisur edhe ndërhyrja nga ajri me dy avionët “Air Tractor” me qëllim vënien e zjarrit nën kontroll.
