Kur miliardat e derdhura pa kriter në epokën e Orbánit fillojnë të lëkunden nga themelet e tyre të kalbura, nuk bëhet fjalë për histori përrallash, por për një dramë politike që po shemb pazaret e bëra prapa kuintave. Qeveria e re hungareze e kryeministrit Péter Magyar ka lëshuar urdhër-hetimin për të futur në lupë të gjitha marrëdhëniet e Grupit 4iG me shtetin hungarez. Vendimi zyrtar nr. 1262/2026, i datës 14 gusht 2026, kërkon një shqyrtim shterues të marrëdhënieve pronësore, financiare, ekonomike dhe kontraktuale mes shtetit dhe 4iG.
Katër ministra kyç janë vënë në linjë zjarri për të dalë publikisht me rezultatet e hetimeve. Mesazhi i qeverisë së re është i prerë: trashëgimia e kontratave galaktike të lëna nga regjimi i vjetër i Orbánit nuk kalon më automatikisht dhe favoret e vjetra nuk vlejnë më.
Perandoria e 4iG, e lidhur ngushtë me biznesmenin Gellért Jászai, u fry nga një kompani relativisht e vogël IT në një përbindësh të telekomunikacionit, mbrojtjes dhe teknologjisë, e majmur me kontrata publike dhe fonde shtetërore. Simboli i kësaj lakmie pa fre është kuadër-kontrata prej 1.311 miliardë forintësh (rreth 3.3–3.7 miliardë euro), e firmosur në mars 2026, pak javë para zgjedhjeve, dhe e shtrirë deri në vitin 2035. Magyar ka deklaruar se faturat paraprake prej rreth 30 miliardë forintësh nuk do të paguhen, duke e shpallur kontratën “joekzistuese” për ekzekutivin e ri.
Ky tërmet politik prek drejtpërdrejt edhe Shqipërinë. Në vitin 2022, 4iG bleu rreth 80% të ALBtelecom dhe 99.899% të ONE Telecommunications, duke kapur peng duopolin celular së bashku me Vodafone Albania.
Tani pyetjet janë të pashmangshme: A do të goditet strategjia e investimeve të One Albania? Çfarë ndodh nëse strukturat e pronësisë në Budapest pësojnë ndryshime drastike? A do të detyrohet operatori të japë llogari me transparencë të plotë për lidhjet e tij me autoritetet shqiptare?
Hetimi sapo ka hapur siparin, ndërsa faturat e majme dhe kontratat e dyshimta të Budapestit janë tashmë nën mikroskopin e qeverisë së re hungareze./Shkrimi u mor nga JOQ Albania!
