Kur po bëhen 12 orë që kur Saranda mbeti në terr total gjatë mbrëmjes së djeshme (13 gusht 2026), autoritetet ende nuk e kanë dhënë një shpjegim për arsyen që shkaktoi këtë avari në kulmin e sezonit kur qyteti është i mbushur me turistë.
Mbrëmjen e djeshme rreth orës 21:30, energjia elektrike në Sarandë u ndërpre papritur dhe qyteti u “zhduk” në terrin e natës.
Ditën e djeshme ministri i turizmit Blendi Gonxhja, doli në një “Stand Up” ku foli për suksesin e turizmit, duke theksuar se tashmë jemi në kulm të sezonit.
“Ne jemi në kulmin e sezonit veror dhe është një sezon që karakterziohet nga shifra shumë pozitive, jo vetëm sa i takon hyrjes së vizitorëve të huaj që është një kënaqësi për ekonominë dhe turizmin, por me mirëmenaxhimin dhe sigurinë e sezonit. Kjo është rezultat i koordinimit të mirë ndërinstitucional,” tha Gonxhja, vetëm disa orë para se një nga qytetet tona kryesore bregdetare të mbetej në “black out”.
Impakti negativ në turizëm i kësaj ngjarje që nuk duhet të kalojë si sipërfaqësore…
Turisti nuk vlerëson vetëm plazhin dhe hotelin, por edhe cilësinë e infrastrukturës dhe shërbimeve. Një qytet turistik që mbetet në errësirë krijon perceptim negativ.
Kjo situatë godet drejtpërdrejt bizneset si hotelet, restorantet, baret, marketet dhe bizneset e tjera që pazgjidhshmërisht varen nga energjia elektrike për të funksionuar normalisht.
Një ndërprerje gjatë mbrëmjes, kur qyteti është në aktivitet të plotë, mund të kthehet në një eksperiencë të pakëndshme për pushuesit.
Kur jemi duke jetuar në një kohë që rrjetet sociale kanë një impakt kaq të gjerë, një situatë e tillë mund të fotografohet dhe publikohet menjëherë, duke ndikuar te mënyra se si Saranda perceptohet nga turistët potencialë./ Iliria News
