Një ngjarje e pazakontë ka vënë në lëvizje policinë në Australi, pasi një valixhe e braktisur në një zonë rurale u dyshua fillimisht se përmbante trupin e një personi.
Ngjarja ndodhi në Oallen, në juglindje të Goulburn, ku dy persona që po udhëtonin nëpër një zonë rurale vunë re valixhen dhe njoftuan autoritetet. Pamja e asaj që ndodhej brenda saj ishte aq bindëse, sa policia nisi hetimet duke e trajtuar rastin si një ngjarje të mundshme kriminale.
Në vendngjarje mbërritën hetues dhe specialistë të mjekësisë ligjore për të ekzaminuar përmbajtjen e valixhes. Megjithatë, ekzaminimet shkencore sollën një rezultat krejt të papritur.
Brenda valixhes nuk ndodhej një trup njerëzor, por një kukull që përdoret për marrëdhënie, e cila për shkak të pamjes së saj ishte ngatërruar fillimisht me një viktimë.
Mbikëqyrësja e Policisë shpjegoi se kukulla ishte aq e ngjashme me një person real, sa në momentet e para ishte e vështirë të dallohej e kundërta.
Sipas autoriteteve, kukulla ishte e veshur, kishte flokë dhe një shpim në hundë. Situata ishte bërë edhe më e dyshimtë për shkak të disa shenjave që dukeshin si mavijosje dhe gërvishtje në trupin e saj.
Vetëm pas përfundimit të ekzaminimeve mjeko-ligjore u konfirmua se nuk bëhej fjalë për një viktimë vrasjeje. Zbulimi i papritur i dha fund hetimit dhe e ktheu një alarm serioz policor në një prej rasteve më të pazakonta të hasura në zonë.
