Detaje të reja kanë dalë nga hetimet për vrasjen e 20-vjeçarit Johan Zuko në Korçë. Kristjan Sterjo, autori i dyshuar i ngjarjes, ka dhënë dëshminë e tij përpara grupit hetimor, duke folur edhe për konfliktin që parapriu ngjarjen.
Sipas dëshmisë së tij, përplasja me 20-vjeçarin lidhej me disa episode të mëparshme mes tyre. Një prej shkaqeve që dyshohet se ndikoi në përshkallëzimin e konfliktit ka qenë pretendimi i Sterjos se viktima kishte ngacmuar të dashurën e tij.
Megjithatë, hetuesit po marrin në konsideratë edhe episode të tjera të konfliktit mes dy të rinjve. Sipas të dhënave paraprake, ata kishin pasur debate disa ditë përpara ngjarjes, ndërsa përplasjet dyshohet se kishin nisur edhe për pretendime lidhur me atë se kush konsiderohej “më i forti” në lagje.
Konflikti, sipas hetimeve, ishte shoqëruar me debate, sharje dhe ngacmime të ndërsjella, duke u përshkallëzuar gradualisht deri në ngjarjen tragjike.
Në ditën e krimit, sipas dëshmisë së të dyshuarit, Sterjo ka marrë armën dhe ka shkuar në ndjekje të 20-vjeçarit. Ai dyshohet se e ka qëlluar Johan Zukon me një plumb pas shpine, plagë e cila rezultoi fatale.
Pas ngjarjes, Sterjo është larguar nga vendi i krimit dhe ka qëndruar i fshehur për disa orë. Ai dyshohet se ishte fshehur fillimisht në një zonë pranë varrezave të qytetit, por më pas është larguar në drejtim të banesës së tij.
Ka qenë pikërisht në këtë moment që forcat e Policisë kanë mundur ta pikasnin dhe ta arrestonin, rreth 6 orë pas vrasjes.
Grupi hetimor vijon punën për zbardhjen e plotë të dinamikës së ngjarjes. Dëshmia e të dyshuarit, së bashku me provat e administruara gjatë hetimit, pritet të ndihmojnë në përcaktimin e rrethanave dhe motivit të saktë që çoi në vrasjen e 20-vjeçarit Johan Zuko.
