Aktori spanjoll Antonio Banderas ka rrëfyer se infarkti që pësoi në vitin 2017 i ndryshoi rrënjësisht mënyrën se si e sheh jetën. Në një intervistë për “People”, ai e cilësoi atë episod si “gjëja më e mirë që më ka ndodhur ndonjëherë”, duke shpjeguar se përvoja pranë vdekjes e bëri të rivlerësonte prioritetet dhe të kuptonte se sa kohë kishte humbur me gjëra të parëndësishme.
“Ishte sikur dikush më vendosi syze për të parë një realitet që më parë nuk e shihja”, tha ai. Banderas u godit nga infarkti në shtëpinë e tij në Surrey, në Angli, ku iu nënshtrua një operacioni urgjent gjatë të cilit mjekët i vendosën tre stenta në arterie. Pas këtij momenti, ai la duhanin, u largua gradualisht nga jeta në Hollywood dhe u rikthye për të jetuar në qytetin e lindjes, Malaga.
“Kur vdekja të afrohet kaq shumë, e kupton me një qartësi të jashtëzakonshme se sa budalla je kur humbet kohën me gjëra që nuk meritojnë të jenë pjesë e jetës tënde”, u shpreh aktori. Ai shtoi se “njerëzit jetojnë sikur nuk do të vdesin kurrë” dhe se tashmë nuk dëshiron të grumbullojë pasuri apo sende, pasi “e vetmja gjë që më intereson tani është përvoja e të jetuarit”.
Në momentet më të vështira, pranë tij ishte partnerja Nicole Kimpel, e cila telefonoi menjëherë shërbimet e emergjencës sapo aktori ndjeu dhimbje të forta në gjoks. Ndërhyrja e shpejtë e mjekëve rezultoi vendimtare. Çifti është në një lidhje që prej vitit 2014, pas ndarjes së Banderas nga ish-bashkëshortja Melanie Griffith. Filozofia e re e jetës po reflektohet edhe në projektet e tij artistike.
Antonio Banderas është pjesë e filmit biografik “Tony”, kushtuar Anthony Bourdain, ku rolin kryesor e interpreton Dominic Sessa. Aktori luan personazhin e Ciros, shefit të kuzhinës që shërbeu si mentor i Bourdain. Edhe pse nuk e ka njohur personalisht kuzhinierin dhe autorin e njohur, Banderas tha se e ka vlerësuar gjithmonë emisionin “No Reservations”, duke e konsideruar atë një program për jetën, më shumë sesa vetëm për gatimin. Sipas tij, pas infarktit, çdo vendim kalon përmes një pyetjeje të vetme: A ia vlen vërtetë?
