Shqipëria ka regjistruar rritje të numrit të vizitorëve të huaj gjatë muajit korrik 2026, sipas të dhënave të publikuara nga ministri i Kulturës dhe Turizmit, Blendi Gonxhja.
Sipas shifrave të bëra publike, në korrik vendi u vizitua nga 1,955,099 shtetas të huaj, ndërsa në korrik të vitit 2025 ishin regjistruar 1,825,490 vizitorë. Diferenca është 129,609 vizitorë më shumë, ose një rritje prej rreth 7.1%.
Krahasuar me muajin qershor 2026, numri i vizitorëve të huaj u rrit me 608,820 persona, duke shënuar një rritje mujore prej 45.22%.
Të dhënat tregojnë një rikthim të ritmit të rritjes pas një ngadalësimi të regjistruar në qershor. Për periudhën janar–maj 2026, rritja ishte 8.2% krahasuar me të njëjtën periudhë të vitit 2025, ndërsa në qershor zbriti në 1.3%, për t’u rritur sërish në korrik.
Gonxhja shkruan si më poshtë:
Në korrik 2026, Shqipëria u vizitua nga 1,955,099 vizitorë të huaj, kundrejt 1,825,490 vizitorëve në korrik 2025.
Kjo përfaqëson një shtesë prej 129,609 vizitorësh, ose një rritje prej rreth 7,1% krahasuar me të njëjtin muaj të vitit të kaluar.
Krahasuar me qershorin 2026, në korrik u regjistruan 608,820 vizitorë të huaj më shumë, duke shënuar një rritje mujore prej 45,22%.
Të dhënat tregojnë një rikuperim të fortë pas ngadalësimit të regjistruar në qershor. Ndërsa periudha janar–maj 2026 regjistroi një rritje prej 8,2% krahasuar me të njëjtën periudhë të vitit 2025, ritmi i rritjes zbriti në 1,3% në qershor dhe u rikthye në 7,1% në korrik.
Këto rezultate tregojnë se ngadalësimi i qershorit nuk u shndërrua në një prirje të qëndrueshme rënëse. Përkundrazi, korriku shënoi një rikuperim të ndjeshëm, duke iu afruar ritmit të lartë të rritjes të regjistruar gjatë pesëmujorit të parë. Megjithatë, nëse qershori 2026 do të kishte vijuar me trendin e njëjtë rritës, numri i vizitorëve të huaj në korrik do të rritej sipas atij trendi në rreth 2,094,542 vizitorë të huaj, çka e krahasuar me rezultatin faktik prej 1,955,099 vizitorë, paraqet një hendek prej 139,443 vizitorësh më pak, ose rreth 6.7% ndaj skenarit të projektuar për korrikun 2026. Ndikimi i vijimit të protestave dhe i episodeve shumë të dëmshme të sulmeve ndaj bizneseve të industrisë shqiptare të mikpritjes, gjatë korrikut, janë arsye shqetësuese për sektorin turistik!
Nga ana tjetër aktivitetet vërtetohen jetike për të gjeneruar turizëm e ekonomi. Veçanërisht për korrikun kanë ndikuar pozitivisht festivalet dhe iteneraret tematike, festat dhe ngjarjet e jashtëzakonshme si eventi i YE (Kanye West) në Tiranë, shumë show e koncerte të skenës artistike të pavarur ose nga institucionet dhe bashkitë, turet e legjendave si nata e Zucchero, eventet ndërkombëtare e konferencat e ndryshme në vend!
