Maturantët të cilët duan të ndjekin studimet në mjekësinë e përgjithshme, një nga programet më të preferuara të arsimit të lartë, do të duhet të ndjekin një tjetër hap për konkurrimine tyre.
Nga data 6 deri 10 gusht do të jenë të hapura aplikimet për provimin e pranimit, që duhet të aplikohet me detyrim për të gjithë maturantët të cilët kanë në preferencat e tyre të rreshtuar këtë program studimi.
Regjistrimi për provimin do të kryhet online, përmes portalit e-Albania. Kandidatët duhet të zgjedhin shërbimin “Aplikim për provimin e pranimit në universitet”, të plotësojnë formularin elektronik dhe të ngarkojnë mandatin përkatës të pagesës, përpara se të dërgojnë aplikimin.
Pas përfundimit të procedurës, secili aplikant do të pajiset me një kod unik.
Përmes këtij kodi do të ketë mundësi të ndjekë statusin e aplikimit, ndërsa njoftimet do t’i marrë në adresën e email-it dhe në e-Albania.Pra, vetëm përzgjedhja e Mjekësisë së Përgjithshme mes preferencave në U-Albania nuk mjafton për të vijuar konkurrimin.
Kandidatët që nuk regjistrohen për Provimin e Pranimit humbasin të drejtën për të konkurruar për programin Mjekësi e Përgjithshme, edhe nëse e kanë renditur atë mes preferencave të tyre.
