Marie-George Buffet, ish-ministrja franceze e Sportit, ka pranuar se kontrollet e befasishme antidoping ndaj kombëtares së Francës u pezulluan para Kupës së Botës 1998.
Deklarata u bë në dokumentarin “Zidane, lindja e një legjende”, ku Buffet pranoi se kishte marrë udhëzime që lojtarët e Francës të mos shqetësoheshin deri në përfundimin e Botërorit.
Ish-mjeku Alain Garnier tregoi se urdhri iu komunikua vetëm verbalisht: “Nuk duhej t’i shqetësoja më Les Bleus deri pas Kupës së Botës. Pra, nuk do të kishte më kontrolle të befasishme.”
Buffet kishte mohuar ekzistencën e një urdhri të tillë gjatë një dëshmie në vitin 2013. Megjithatë, ajo tani pranoi se udhëzimi mund të kishte ardhur nga nivelet më të larta qeveritare.
Kontrollet e kryera ndaj futbollistëve francezë në vitin 1997 kishin rezultuar të gjitha negative.
