Kriza e emigrantëve në enklavën spanjolle të Ceutës ka rikthyer debatin brenda Bashkimit Evropian për menaxhimin e kufijve dhe kontrollin e migracionit të paligjshëm.
Presidentja e Komisionit Evropian, Ursula von der Leyen, ka kërkuar një reagim të koordinuar nga vendet anëtare për përballimin e presionit në kufijtë e jashtëm të Unionit.
Në një letër drejtuar kryeministrit spanjoll Pedro Sanchez, Von der Leyen ka kërkuar forcimin e masave të sigurisë në zonat më të ekspozuara ndaj flukseve migratore, përfshirë rritjen e mbikëqyrjes kufitare dhe përdorimin e barrierave fizike në rast nevoje. Kriza në Ceuta shpërtheu pas hyrjes masive të emigrantëve nga Maroku në territorin spanjoll në Afrikën e Veriut. Situata solli tensione mes vendeve të BE-së, me disa shtete që kërkuan masa më të forta ndaj Spanjës, përfshirë edhe diskutime për kufizime të mundshme në zonën Shengen.
Madridit iu kundërpërgjigj duke kundërshtuar kritikat dhe duke kërkuar një takim të ministrave të Brendshëm të BE-së për të hartuar një qasje të përbashkët ndaj migracionit.
Von der Leyen ka propozuar gjithashtu forcimin e sistemeve të paralajmërimit të hershëm për kufijtë në bashkëpunim me Spanjën, veçanërisht në zonat e Ceutës dhe Meliljes. Në të njëjtën kohë, ajo ka kërkuar rritjen e mbështetjes teknike dhe financiare për Marokun për menaxhimin e flukseve migratore.
Bashkimi Evropian ka intensifikuar muajt e fundit politikat për kontrollin e migracionit, duke u dhënë vendeve anëtare mundësi të reja për menaxhimin e azilkërkuesve dhe krijimin e qendrave pritëse jashtë territorit të Unionit.
