Gheuwan Arja, një nënë nga Sidnei i Australisë, ka ndarë historinë prekëse të djalit të saj, Omar Arja, i cili humbi jetën pas një beteje të gjatë me kancerin.
Në vitin 2021, kur ishte vetëm 10 vjeç, Omar u diagnostikua me limfomë jo-Hodgkin, një formë kanceri. Ai iu nënshtrua gjashtë muaj kimioterapi dhe 18 ndërhyrjeve kirurgjikale, por trajtimet nuk arritën ta ndalonin sëmundjen.
Më vonë, mjekët i thanë Gheuwan dhe bashkëshortit të saj, Fadi, se nuk kishte më mundësi trajtimi dhe se Omar duhej të kalonte kohën e mbetur në shtëpi me familjen. Por në vend që t’i tregonte të birit se po i afrohej fundit të jetës, nëna zgjodhi t’i thoshte se trajtimi kishte funksionuar dhe se po kthehej në shtëpi sepse po përmirësohej.
Omar ndërroi jetë në janar të vitit 2022, por ditët e fundit të jetës i kaloi duke besuar se e kishte mposhtur sëmundjen. Gheuwan tha se mori këtë vendim të dhimbshëm për ta mbrojtur djalin nga frika dhe ankthi, veçanërisht pasi kishte humbur më parë edhe dy fëmijë të tjerë.
Vajza e saj, Aisha Arja, ndërroi jetë në vitin 2009, në moshën 4-vjeçare, për shkak të një sëmundjeje të rrallë, ndërsa djali Mohamed Arja humbi jetën në vitin 2019, në moshën 9-vjeçare, pas një tumori në tru. Historia e familjes Arja tregon dhimbjen e madhe të një nëne, por edhe forcën dhe sakrificat e prindërve për të mbrojtur fëmijët e tyre. Gheuwan vazhdoi jetën së bashku me fëmijët e saj të tjerë, Rabieh dhe Luay.
