Jola Hysaj, ish-sekretare për Marrëdhëniet me Publikun në Partinë Demokratike, është emëruar drejtoreshë e Agjencisë Kombëtare të Turizmit.
Hysaj u largua nga strukturat drejtuese të Partisë Demokratike në muajin mars të këtij viti. Më herët, ajo u propozua nga PD si kandidate për postin e Avokatit të Popullit, por kandidatura e saj nuk u finalizua.
Emërimi i saj rikthen në vëmendje edhe çështjet që lidhen me familjen e saj. Bashkëshorti i saj, Leonard Kadrimi, ish-zëvendësdrejtor i Kadastrës së Durrësit, u arrestua në prill të vitit 2024 në kuadër të hetimeve për një skemë të dyshuar tjetërsimi pronash që lidhej me një sipërfaqe prej rreth 448 mijë metrash katrorë. Ai u lirua nga paraburgimi në korrik 2024, ndërsa çështja ndaj tij vijon të jetë në proces gjyqësor.
Agjencia Kombëtare e Turizmit është institucioni që promovon Shqipërinë në tregjet ndërkombëtare, harton fushata marketingu dhe përfaqëson vendin në panairet më të rëndësishme të sektorit. Pikërisht për këtë arsye, emërimi i Jola Hysajt ngre një pyetje të thjeshtë: cili është kontributi i saj në turizëm që e çoi në krye të këtij institucioni?
Në fund, mbetet një pyetje: çfarë e çoi Jola Hysajn në krye të Agjencisë Kombëtare të Turizmit? Përvoja në këtë sektor apo fakti që në politikën shqiptare besnikëria ndryshon adresë, por rrallëherë mbetet pa shpërblim? Nëse është kjo e dyta, atëherë mesa duket tradhtia ka çmim./ Marrë nga VNA.al
