FIFA ka zgjedhur golin e Sindy López Cabral ndaj Argjentinës si realizimin më të bukur të Kupës së Botës 2026.
Futbollisti i Kepit të Gjelbër realizoi një gol të jashtëzakonshëm në minutën e 103-të të ndeshjes së fazës së 1/16-ave, duke barazuar përkohësisht rezultatin ndaj “Albiceleste”-s.
Pas një lëvizjeje të bukur në krahun e majtë, ku kaloi Alexis Mac Allister, López Cabral goditi fuqishëm me të djathtën dhe e dërgoi topin në trekëndëshin e portës argjentinase.
“Sapo kalova kundërshtarin, pashë hapësirën dhe mendova ta provoja. Synova trekëndëshin dhe goditja doli në mënyrë perfekte”, tregoi 23-vjeçari për FIFA-n.
Pas golit, mbrojtësi vrapoi drejt tribunës për të përqafuar të dashurën, ndërsa shokët e skuadrës festuan të habitur nga realizimi spektakolar.
Argjentina arriti ta fitonte ndeshjen pas një autogoli, por goditja e López Cabral mbeti një nga momentet më të paharrueshme të turneut.
Në podiumin e golave më të bukur u renditën gjithashtu realizimi i Eldor Shomurodov ndaj Republikës Çeke dhe ai i Wilson Isidor ndaj Marokut.
