Policia e Tiranës ka finalizuar operacionin e koduar “Skema”, duke arrestuar pronarin e një servisi automjetesh në zonën e Astirit, i dyshuar për mashtrim ndaj klientëve.
Sipas hetimeve të Komisariatit të Policisë Nr. 6, 37-vjeçari me inicialet Mirjan Hasadyshohet se nuk ka kryer riparimet për automjetet që i ishin lënë në servis, edhe pse pronarët kishin paguar shërbimet. Autoritetet kanë dokumentuar deri tani 6 raste të kësaj veprimtarie kriminale.
Përveç mosriparimit të automjeteve, hetuesit dyshojnë se në disa raste 37-vjeçari ka tentuar edhe t’i shiste makinat që klientët i kishin lënë për rregullim në servis.
Gjatë operacionit, policia sekuestroi në ambientet e subjektit 5 automjete, të cilat më pas iu lanë në ruajtje pronarëve të tyre.
Hetimet vijojnë për të zbuluar nëse i arrestuari mund të jetë përfshirë në raste të tjera të ngjashme. Materialet procedurale i janë referuar Prokurorisë së Tiranës për veprime të mëtejshme.
