Për herë të parë, votuesit shqiptarë që jetojnë jashtë vendit do të kenë mundësinë të marrin pjesë në zgjedhjet parlamentare të 11 majit përmes votës elektronike. Procesi i regjistrimit në Platformën Elektronike të Zgjedhësve PER ka nisur më 11 janar dhe do të zgjasë deri më 4 mars.
Sipas Komisionit Qendror të Zgjedhjeve, deri më tani janë regjistruar 117 096 votues nga jashtë, ndërsa 71 945 kërkesa janë miratuar. Sipas statistikave, shumica e votuesve të regjistruar janë meshkuj me 70 185 aplikime ose 59.9 përqind, ndërsa femrat janë 46 911 ose 40.1 përqind. Për sa i përket grupmoshave, dominon grupi 26 deri 35 vjeç me mbi 33 000 aplikime.
Numri më i madh i regjistrimeve vjen nga Italia me 43 079 aplikime, e ndjekur nga Greqia me 31 460, Gjermania me 14 428 dhe SHBA me 8 656. Ndërsa nga bashkitë shqiptare, më shumë aplikime janë bërë për Tiranën me 22 116 regjistrime, Fierin me 16 763 dhe Korçën me 12 531.
Megjithatë, një numër i konsiderueshëm kërkesash është refuzuar, plot 42 385, çka mund të ndikojë në përfshirjen e diasporës në procesin zgjedhor.
