Një aksident me pasojë vdekjen ka ndodhur mëngjesin e kësaj të hëne në aksin rrugor Lushnjë–Rrogozhinë.
Vizion Plus mëson se viktima është Bajame Ramazani, rreth 75 vjeçe. Sipas informacioneve paraprake, e moshuara ishte duke kaluar në këmbë trafikndarësen e autostradës, në përpjekje për të kaluar në krahun tjetër të rrugës, kur u përplas nga një automjet tip Kia.
Si pasojë e përplasjes së fortë, 75-vjeçarja humbi jetën në vendngjarje.
Aksi Lushnjë–Rrogozhinë është ndër segmentet rrugore ku aksidente të tilla regjistrohen shpesh. Megjithëse në hyrje të fshatrave janë ndërtuar mbikalime për këmbësorët, shumë banorë vijojnë të kalojnë autostradën, duke rrezikuar jetën e tyre.
