Shtetet e Bashkuara kanë nisur kthimin e avionëve të furnizimit me karburant në bazat e tyre në Lindjen e Mesme, ndërsa tensionet me Iranin vijojnë të rriten. Sipas mediave izraelite, në Izrael ekziston bindja se Uashingtoni mund t’i japë dritën jeshile Tel Avivit për të rifilluar sulmet kundër Teheranit.
Transmetuesi publik KAN raportoi se vlerësimet në Izrael janë se SHBA-ja mund të mbështesë një përgjigje ushtarake izraelite ndaj Iranit. Ndërkohë, Channel 12 bëri të ditur se strukturat e mbrojtjes izraelite po monitorojnë nga afër zhvillimet pas shkëmbimit të sulmeve mes SHBA-së dhe Iranit.
Sipas raportimeve, kryeministri Benjamin Netanyahu pritet të zhvillojë një mbledhje të Këshillit të Sigurisë me ministrin e Mbrojtjes, Israel Katz, për të shqyrtuar situatën. Zhvillimet vijnë pasi presidenti amerikan Donald Trump deklaroi se SHBA-ja “ndoshta” do të kryejë sulme të tjera ndaj Iranit dhe se memorandumi i mirëkuptimit i nënshkruar muajin e kaluar për t’i dhënë fund konfliktit “ka mbaruar”.
