Presidenti Bajram Begaj ka nisur sot vizitën në Luginën e Preshevës, ku tha se jetojnë shqiptarë “në trojet e veta, fatkeqësisht jashtë trupit amë”.
Në një postim në rrjetet sociale, kreu i shtetit thotë se u shpreh se u prit “me flamur e zemrat plot dashuri”, ndërsa zhvilloi takime me kryetarët e komunave, Ardita Sinani dhe Arbër Bajaziti, deputetin shqiptar në Parlamentin e Serbisë, Shaip Kamberi, si dhe kryetarin e Këshillit Kombëtar Shqiptar të Luginës së Preshevës, Enkel Rexhepi.
Në fokus të bisedimeve ishin shqetësimet e shqiptarëve të Luginës, forcimi i bashkimit të faktorit shqiptar dhe projektet që do të ndihmojnë rininë e kësaj treve.
Begaj tha se i inkurajoi liderët politikë shqiptarë “të bashkohen sa herë bëhet fjalë për interesin kombëtar”, veçanërisht për mbrojtjen e të drejtave të shqiptarëve të Luginës së Preshevës.
Ai garantoi mbështetjen e Shqipërisë për adresimin e çështjeve si përfaqësimi i drejtë në institucione, pasivizimi i adresave, përdorimi i gjuhës amtare dhe simboleve kombëtare.
“Do të vazhdoj të jem, si deri më tani, avokat i tyre, avokat i të drejtave të mohuara të shqiptarëve të Luginës në çdo institucion dhe kancelari ndërkombëtare”, u shpreh Begaj.
