Parisi po përgatitet për një mbrëmje me masa të shtuara sigurie përpara çerekfinales së Kupës së Botës mes Francës dhe Marokut.
Sipas Le Parisien, kryeqyteti francez do të ketë një operacion të veçantë sigurie për të parandaluar trazirat dhe incidentet e mundshme gjatë dhe pas ndeshjes. Prefektura e Policisë së Parisit ka miratuar përdorimin e dronëve të sigurisë për të monitoruar qytetin.
Vendimi vjen duke pasur parasysh atë që ndodhi në vitin 2022, pas fitores së Francës ndaj Marokut në gjysmëfinalet e Botërorit të Katarit. Në atë kohë, në Francë u regjistruan më shumë se 266 arrestime, 167 prej tyre në Paris.
Masat do të hyjnë në fuqi në orën 21:00 të së enjtes, një orë para nisjes së ndeshjes. Autoritetet kanë ndaluar gjithashtu përdorimin e mjeteve piroteknike dhe fishekzjarrëve.
Champs-Élysées, një nga zonat më të ndjeshme dhe më të frekuentuara të Parisit, do të jetë nën mbikëqyrje të fortë gjatë gjithë mbrëmjes. Disa pronarë dyqanesh pritet të mbrojnë ambientet e tyre për të shmangur dëme apo grabitje të mundshme.
Autoritetet kanë vendosur edhe mbylljen e disa stacioneve të metrosë pranë zonës së Champs-Élysées, për të kufizuar grumbullimet e mëdha të tifozëve. Në linjën 6, stacionet mes Charles de Gaulle-Étoile dhe Trocadéro do të qëndrojnë të mbyllura gjatë natës, ndërsa kufizime do të ketë edhe në linjat 8, 9, 12 dhe 14.
Ndeshja është cilësuar me rrezik të lartë nga prefektura, duke marrë parasysh rëndësinë sportive të takimit dhe mundësinë e grumbullimeve të shumta në kryeqytet.
Franca dhe Maroku do të përballen për një vend në gjysmëfinalet e Botërorit, ndërsa Parisi po përgatitet që festa e futbollit të mos kthehet në trazira në rrugë.
