Eliminimi dramatik ndaj Argjentinës ka lënë shumë zemërim te Egjipti. Pas humbjes 3-2 në fazën e 1/16-ave të Kupës së Botës, trajneri Hossam Hassan shpërtheu ndaj arbitrimit dhe FIFA-s, duke e cilësuar rezultatin si të ndikuar nga vendime të padrejta.
Hassan u shpreh se skuadra e tij kishte bërë një ndeshje shumë të mirë dhe se nuk meritonte të largohej nga turneu në këtë mënyrë. Sipas tij, Egjipti ishte dëmtuar nga disa episode vendimtare gjatë ndeshjes.
“E tejkaluam Argjentinën në çdo aspekt. Rezultati u ndikua nga faktorë të brendshëm. Ne bëmë gjithçka mirë dhe në fund vuajtëm. Meritoni fitoren. Largohemi me kokën lart, por nuk pati fair play dhe respekt”, u shpreh trajneri egjiptian.
Ai kritikoi edhe përdorimin e VAR-it, duke pretenduar se një penallti në favor të Egjiptit nuk u rishikua dhe se një gol u anulua në mënyrë të çuditshme.
“Të gjithë e pamë atë tërheqje, por VAR-i nuk ndërhyri fare. Pse nuk ka drejtësi në futboll? Nuk jam i bindur nga ky rezultat dhe nga mënyra si shkoi ndeshja. Ishte një padrejtësi”, shtoi Hassan.
Trajneri egjiptian ngriti dyshime edhe për orarin e ndeshjes, duke thënë se nuk është normale të luhet në mesditë, sidomos në një fazë kaq të rëndësishme të Botërorit. Ai deklaroi se nuk do të ndjekë më asnjë ndeshje të këtij turneu si formë proteste.
Përveç trajnerit, edhe Mostafa Zico reagoi ashpër pas eliminimit. Sulmuesi, i cili shënoi golin e dytë të Egjiptit dhe pa një tjetër gol t’i anulohej, nuk e fshehu zemërimin pas ndeshjes.
“Ishte e padrejtë. Arbitri hodhi poshtë mundin e një vendi të tërë”, tha Zico.
Më pas ai shkoi edhe më tej, duke akuzuar rëndë organizimin e turneut: “Kampionati është i manipuluar. Çfarëdo që të ndodhë, Argjentina do të fitojë.”
Egjipti largohet nga Botërori me zhgënjim të madh, ndërsa deklaratat e Hassan dhe Zico pritet të hapin debate të forta pas një prej ndeshjeve më dramatike të turneut.
