Argjentina ka siguruar kualifikimin në çerekfinalet e Kupës së Botës pas një fitoreje dramatike 3-2 ndaj Egjiptit, në një ndeshje ku kampionët e botës ishin shumë pranë eliminimit.
Egjipti e nisi më mirë sfidën dhe kaloi shpejt në avantazh me Yasser Ibrahim. Pas një aksioni nga krahu i djathtë, mbrojtësi egjiptian goditi saktë me kokë dhe dërgoi topin në rrjetë, duke ndezur festën e afrikanëve.
Argjentina pati mundësinë të reagonte pak minuta më vonë, kur Tagliafico u rrëzua në zonë dhe arbitri akordoi penallti. Messi mori përsipër goditjen, por portieri Shobeir e ndali, duke mbajtur Egjiptin në avantazh.
Në pjesën e dytë, situata u bë edhe më e vështirë për argjentinasit. Egjipti gjeti golin e dytë me Mostafa Ziko, pas një aksioni të rrezikshëm që fillimisht u anulua nga VAR, por më pas përfundoi me realizimin e vlefshëm të sulmuesit egjiptian.
Kur dukej se Argjentina ishte shumë pranë eliminimit, Messi mori skuadrën mbi shpinë. Fillimisht ai asistoi për Cuti Romeron, i cili shënoi me kokë dhe rihapi ndeshjen. Pak momente më vonë, kapiteni argjentinas barazoi rezultatin me të majtën e tij, duke rikthyer shpresën te kampionët e botës.
Egjipti pati disa mundësi për të surprizuar sërish, por nuk arriti t’i shfrytëzonte. Në shtesë erdhi goditja finale e Argjentinës: Lautaro Martínez krosoi në mënyrë perfekte dhe Enzo Fernández shënoi me kokë golin e përmbysjes së madhe.
Nga një eliminim që dukej shumë pranë, Argjentina u rikthye në jetë dhe siguroi një kualifikim historik. Messi mbetet legjenda e kësaj skuadre, por këtë herë skenën e mori Enzo, autori i golit që dërgoi kampionët e botës në çerekfinale.
