Roberto Martínez nuk do të jetë më trajner i Portugalisë pas eliminimit nga Kupa e Botës. Pas humbjes ndaj Spanjës në fazën e 1/16-ave, tekniku spanjoll konfirmoi se kjo ishte ndeshja e tij e fundit në krye të kombëtares portugeze.
Vendimi ishte i parashikuar edhe në kontratën e tij dhe, sipas burimeve pranë trajnerit, ishte marrë më herët, pavarësisht se si do të shkonte aventura e Portugalisë në Botëror.
Pas ndeshjes, Martínez vlerësoi paraqitjen e skuadrës së tij, duke thënë se Portugalia meritonte të paktën shtesat. Sipas tij, sfida ndaj Spanjës ishte shumë e ekuilibruar, me dy skuadra që kërkuan kontrollin e topit dhe u mbështetën te cilësia individuale.
“Ishte një ndeshje e nivelit të lartë, teknikisht dhe taktikisht. Është për të ardhur keq. Mendoj se barazimi dhe shtesat do të kishin qenë rezultati më i drejtë. Rasti i parë i qartë i Spanjës përfundoi në gol”, u shpreh ai.
Trajneri theksoi se Portugalia nuk u dorëzua dhe se skuadra tregoi organizim, guxim në mbrojtje dhe agresivitet. Megjithatë, sipas tij, në ndeshje të tilla vendosin detajet.
“Në fazën me eliminim direkt të një Botërori, detajet bëjnë diferencën. Një top që prek traversën dhe hyn ose jo, një goditje standarde në minutën e 90-të… këto janë momentet që vendosin”, tha Martínez.
Ai u shpreh krenar për lojtarët dhe për punën e bërë gjatë turneut, edhe pse pranoi se Portugalia largohet me trishtim të madh nga Botërori.
Në konferencën për shtyp, Martínez konfirmoi përfundimisht largimin: “Është e vërtetë, kjo ishte ndeshja ime e fundit me kombëtaren e Portugalisë.”
