Endrick po përballet sërish me një moment delikat te Real Madrid. Sulmuesi brazilian, i cili nuk ka pasur shumë hapësira në Kupën e Botës, e di se sezoni i ri mund t’i sjellë një tjetër konkurrencë të fortë në skuadër.
Në sezonin e tij të parë me Real Madrid, ende nën drejtimin e Carlo Ancelottit, Endrick nuk arriti as 1000 minuta në fushë, por megjithatë shënoi 7 gola dhe dha një asist. Më pas, sezoni i dytë nisi keq për të, pasi u dëmtua dhe humbi terren në hierarkinë e skuadrës.
Me Xabi Alonson në stol, situata nuk ishte më e lehtë. Trajneri e vlerësonte më shumë Gonzalon, aq sa në merkaton e dimrit u kërkua një huazim te Lyon për Endrick, me qëllimin që braziliani të merrte minuta dhe të tregonte veten.
Dhe Endrick ia doli. Në gjysmën e dytë të sezonit, ai shënoi 8 gola dhe dha 8 asiste, duke fituar një vend në listën e Brazilit për Kupën e Botës dhe duke siguruar rikthimin te Real Madrid.
Megjithatë, Botërori nuk ka shkuar siç pritej për të. Endrick ka luajtur vetëm 34 minuta në fazën e grupeve, ndërsa Ancelotti i ka dhënë më shumë hapësira lojtarëve të tjerë. Rayan, sidomos pas dëmtimit të Raphinhas, ka marrë më shumë besim, ndërsa Endrick është aktivizuar vetëm në minutat e fundit ndaj Haitit dhe Skocisë.
Sfida e parë për të është të fitojë më shumë hapësira me Brazilin në fazën me eliminim direkt. Më pas vjen sfida edhe më e madhe: të bindë José Mourinhon te Real Madrid.
Sipas AS, Mourinho i ka kërkuar klubit një sulmues më klinik në zonë, një profil të ngjashëm me Joselun, që mund të jetë alternativë për Kylian Mbappé. Megjithatë, kjo nuk konsiderohet prioritet absolut dhe për këtë arsye Real Madrid mund të mos ndërhyjë në merkato.
Në këtë skenar, Gonzalo mund të jetë emri i zgjedhur për atë rol. Prania e tij do ta vështirësonte edhe më shumë situatën e Endrick, pasi do të ulte hapësirat për sulmuesin brazilian gjatë sezonit.
Plani i Real Madrid për Endrick nuk ka ndryshuar. Klubi vazhdon ta konsiderojë pjesë të rëndësishme të së ardhmes dhe ai pritet të jetë në skuadër sezonin e ardhshëm. Por konkurrenca me Gonzalon dhe kërkesat e Mourinhos e vendosin sërish në provë.
Endrick mund të marrë minuta edhe në krahun e djathtë, sidomos për shkak të dëmtimit të Rodrygos dhe huazimit të pritshëm të Mastantuonos. Megjithatë, për të siguruar një rol më të madh, braziliani duhet të bindë që në fazën përgatitore.
