Anglia ka mbyllur Grupin L në vendin e parë pas fitores 2-0 ndaj Panamasë, në një ndeshje ku Jude Bellingham ishte protagonisti kryesor për skuadrën e Thomas Tuchel.
Mesfushori i Real Madrid shënoi një gol dhe dha një asist, duke i dhënë drejtim një Anglie që nuk shkëlqeu, por mori rezultatin që i duhej. Panama, nga ana tjetër, bëri një paraqitje të fortë dhe meritonte më shumë, por mbetet ende pa fitore në historinë e saj në Kupën e Botës.
Tuchel bëri disa ndryshime në formacion, duke ulur Bellingham më prapa në mesfushë, ndërsa Rashford dhe Saka morën vend në krahët e sulmit. Pavarësisht zotërimit të topit, Anglia pati vështirësi në pjesën e parë për të krijuar raste të pastra, ndërsa Pickford u desh të ndërhynte për të ndalur një goditje të mirë të Puma Rodríguez.
Ndeshja u zhbllokua në pjesën e dytë, kur Bellingham shfrytëzoi me zgjuarsi një goditje nga këndi dhe kaloi Anglinë në avantazh. Më pas, ai shërbeu për Harry Kane, i cili realizoi me kokë golin e dytë dhe vulosi fitoren e anglezëve.
Në ndeshjen tjetër të grupit, Kroacia mposhti 2-1 Ganën dhe siguroi kualifikimin në fazën e 1/16-ave si vendi i dytë. Golat e Sucic dhe Vlasic i dhanë kroatëve një fitore shumë të rëndësishme, ndërsa Gana, pavarësisht humbjes, vazhdon më tej si një nga tetë vendet e treta më të mira.
Me këto rezultate, Anglia kalon në fazën tjetër si kryesuese e Grupit L, Kroacia e ndjek nga vendi i dytë, ndërsa Gana mban gjallë aventurën në Botëror falë renditjes mes ekipeve më të mira të vendeve të treta.
