Real Madrid ka një prioritet të qartë para se të bëjë lëvizje të tjera në merkato: të ulë numrin e lojtarëve në skuadër. Aktualisht, Mourinho ka në dispozicion 27 futbollistë të ekipit të parë, ndërsa me Thiagon shifra mund të shkojë në 28.
Situata në Bernabéu shihet si e papërballueshme, pasi para afrimeve të reja duhet patjetër të ketë largime. Klubi është i hapur të dëgjojë oferta dhe disa emra janë tashmë në tavolinë, edhe pse Mourinho dëshiron t’i shohë disa prej tyre nga afër përpara se të marrë vendimin final.
Kjo mund të bëjë që pjesa më e madhe e merkatos së Real Madrid të shtyhet të paktën deri më 13 korrik, kur trajneri portugez pritet të nisë punën konkrete me grupin. Për momentin, merkato e madrilenëve është më shumë e fokusuar te largimet sesa te afrimet.
Në mbrojtje, dy emrat që mund të largohen janë Asencio dhe Fran García. Real Madrid ka disa alternativa në qendër të prapavijës dhe po punon edhe për një tjetër mbrojtës, çka e bën hapësirën për Asencion shumë të kufizuar. Edhe Fran García ka interes nga disa klube, mes tyre Betis dhe Bournemouth.
Në mesfushë, situata është edhe më delikate. Tchouaméni, Camavinga dhe Ceballos janë tre emrat që po vlerësohen nga klubi. Për Tchouaménin dhe Camavingan, Real Madrid do të pranonte largim vetëm nëse vjen një ofertë e rëndësishme, ndërsa Ceballos shihet më shumë si një mundësi për të liruar vend në skuadër.
Rasti i Camavingas është një nga më interesantët. Klubi nuk dëshiron ta falë lojtarin, por është gati të dëgjojë oferta serioze. Nëse vjen një propozim i madh, shitja e tij mund të bëhet operacioni kryesor i kësaj vere dhe të mbyllë derën për largimin e Tchouaménit.
Edhe në sulm ka dilema. Mastantuono mund të huazohet, por Real Madrid nuk mendon ta shesë përfundimisht, pasi ende beson te potenciali i tij. Brahim dëshiron të qëndrojë dhe e ka bërë të qartë këtë, edhe pse klubi nuk e konsideron plotësisht të paprekshëm.
Ndryshe është situata e Gonzalos. Ai ishte drejt largimit, por Mourinho ka ndalur gjithçka për momentin, sepse dëshiron ta vlerësojë personalisht. Me Mbappén dhe rikthimin e Endrick, hapësirat për të duken shumë të kufizuara, por vendimi final do të merret vetëm pasi trajneri ta shohë nga afër.
Për momentin, emrat kryesorë që janë në tavolinë janë Asencio, Fran García, Tchouaméni, Camavinga, Ceballos, Mastantuono, Brahim dhe Gonzalo. Real Madrid ka ende nevojë për një mbrojtës dhe një mesfushor, por para se të sjellë lojtarë të rinj, duhet të hapë vend në skuadër.
Operacioni i largimeve është aktivizuar. Jo si zgjedhje, por si domosdoshmëri.
