Real Madrid ka vendosur të aktivizojë klauzolën e riblerjes për Nico Paz, duke e rikthyer formalisht mesfushorin argjentinas në klub për 10 milionë euro.
Takimi me drejtuesit e Comos në Valdebebas është ende në zhvillim, por linja e klubit madrilen është e qartë. Real Madrid nuk dëshiron të bëjë ulje dhe synon të mbajë kontrollin mbi të ardhmen e një prej talenteve më të kërkuar të momentit.
Sipas planit të madrilenëve, Como mund ta blejë sërish lojtarin për 60 milionë euro, me kusht që Real Madrid të ruajë një tjetër klauzolë riblerjeje për vitin e ardhshëm, këtë herë me vlerë 80 milionë euro.
Megjithatë, shifra prej 60 milionë eurosh shihet si shumë e lartë për skuadrën e Cesc Fabregas. Nëse Como nuk e pranon këtë mundësi, atëherë mund të hapet një ankand mes klubeve të mëdha europiane të interesuara për Nico Paz.
Për Real Madrid, kjo është një mënyrë për të përfituar nga rritja e vlerës së lojtarit, pa humbur plotësisht kontrollin mbi të ardhmen e tij.
