Lajm i keq për Gjermaninë në Botërorin 2026. Nico Schlotterbeck do të humbasë pjesën e mbetur të turneut, pasi analizat mjekësore konfirmuan një dëmtim të ligamentit në kyçin e majtë.
Sipas Bild, një kontroll i dytë konfirmoi seriozitetin e dëmtimit që mbrojtësi i Borussia Dortmund pësoi gjatë ndeshjes ndaj Bregut të Fildishtë, të fituar 2-1 nga Gjermania. Schlotterbeck pritet të qëndrojë jashtë fushave për të paktën tetë javë.
Dëmtimi ndodhi në minutën e 13-të, pas një përdredhjeje të kyçit. Pavarësisht dhimbjeve, mbrojtësi tentoi të vazhdonte lojën dhe qëndroi në fushë deri në pushim, para se të kërkonte zëvendësimin.
Mungesa e tij është një goditje e rëndë për Julian Nagelsmann, i cili humbet një nga mbrojtësit më të rëndësishëm për pjesën e mbetur të Botërorit. Pas daljes së tij ndaj Bregut të Fildishtë, në fushë hyri Antonio Rüdiger, i cili pritet të marrë një rol edhe më të madh në prapavijën gjermane.
Mbrojtësi i Real Madrid do të udhëheqë tani repartin defensiv së bashku me Jonathan Tah.
Megjithatë, dëmtimi shihet si “e keqja më e vogël” për të ardhmen e menjëhershme të Schlotterbeck. Emri i tij është lidhur me Real Madrid, pasi José Mourinho ka kërkuar afrimin e një tjetër qendërmbrojtësi. Në kontratën e rinovuar së fundmi, lojtari ka një klauzolë që mund ta lejojë të largohet për rreth 50 milionë euro drejt disa klubeve të caktuara.
