Gjermania ka siguruar kualifikimin në fazën e 1/32-ve të Botërorit 2026, pas një fitoreje me përmbysje 2-1 ndaj Bregut të Fildishtë.
Skuadra e Julian Nagelsmann u gjend në vështirësi pas golit të Franck Kessié, i cili kaloi afrikanët në avantazh pas një aksioni të bukur nga krahu. Bregu i Fildishtë luajti me intensitet, u mbrojt me kujdes dhe rrezikoi disa herë në kundërsulm.
Gjermania kishte më shumë kontroll të topit, por për shumë minuta nuk arriti të gjente rrugën drejt portës. Havertz provoi me kokë, ndërsa dy gola u anuluan me të drejtë për faulle të mëparshme.
Në pjesën e dytë, Nagelsmann ndryshoi ndeshjen nga stoli. Ai hodhi në fushë Leweling, Amiri dhe Deniz Undav, dhe pikërisht sulmuesi i Stuttgart u kthye në protagonistin absolut.
Undav fillimisht nisi aksionin e golit të barazimit, duke hapur lojën për Amirin në krahun e djathtë. Krosimi i tij përfundoi në zonë, aty ku Undav goditi saktë me kokë dhe riktheu Gjermaninë në lojë.
Kur gjithçka dukej se po shkonte drejt barazimit, erdhi goditja finale. Në minutën e 94-të, Nmecha shërbeu një top perfekt për Undav, i cili nuk gaboi përballë Fofanas dhe shënoi golin e fitores.
Me këtë dopietë, Undav konfirmohet si një nga lojtarët më vendimtarë të Gjermanisë në këtë Botëror, me tre gola dhe një asist deri tani.
Statistikat tregojnë dominimin e gjermanëve: 59.4% mbajtje topi, 16 gjuajtje, 7 goditje në portë dhe 1.83 xG. Bregu i Fildishtë, nga ana tjetër, pati 9 gjuajtje dhe 2 në portë, por nuk arriti ta mbyllte ndeshjen kur kishte mundësinë.
Gjermania vuajti, reagoi dhe fitoi me karakter. Pas goleades ndaj Curaçaos, këtë herë tregoi se di të fitojë edhe kur ndeshja bëhet e vështirë.
