Policia e Tiranës ka goditur një tjetër rast të trafikimit dhe shpërndarjes së lëndëve narkotike të forta, duke arrestuar një 44-vjeçar që dyshohet se furnizonte dhe shpërndante kokainë në zona të ndryshme të kryeqytetit.
Në kuadër të operacionit policor të koduar “Bulevardi”, specialistët e Seksionit për Hetimin e Narkotikëve vunë në pranga shtetasin S.K., 44 vjeç, banues në Vorë.
Sipas Policisë, pas informacioneve të siguruara në rrugë operative se ai do të transportonte një sasi të konsiderueshme kokaine në zonën e Bulevardit të Ri dhe në segmentet rrugore që lidhin Tiranën me Urën e Paskuqanit, u organizua ndërhyrja për kapjen e tij.
44-vjeçari u ndalua në rrugën “Riglata”, ku gjatë kontrollit fizik iu gjetën dhe sekuestruan dy paketime me lëndë të dyshuar narkotike kokainë, me peshë totale rreth 1 kilogram e 680 gramë.
Nga hetimet paraprake rezulton se ai furnizonte persona të tjerë me kokainë për shitje në doza, ndërsa një pjesë të saj dyshohet se e shpërndante vetë.
Policia bëri të ditur se gjatë operacioneve antidrogë të zhvilluara në muajt maj dhe qershor, në kuadër të operacionit “Zonat”, janë sekuestruar gjithsej rreth 1.5 kilogramë kokainë dhe 1.1 kilogramë heroinë.
Hetimet vijojnë në bashkëpunim me Prokurorinë për identifikimin dhe arrestimin e personave të tjerë të përfshirë në këtë veprimtari kriminale. Materialet procedurale i janë referuar Prokurorisë së Tiranës për veprën penale “Prodhimi dhe shitja e narkotikëve”.
