Maroku ka marrë dy lajme të këqija vetëm pak ditë para nisjes së Botërorit 2026. Nayef Aguerd dhe Abdessamad Ezzalzouli janë përjashtuar zyrtarisht nga lista përfundimtare e skuadrës për shkak dëmtimesh.
Dy lojtarët nuk do të jenë në dispozicion të “Luanëve të Atlasit” për turneun, ndërsa mungesa e tyre vjen në një moment delikat, para ndeshjes së parë ndaj Brazilit.
Ezzalzouli pësoi një ndrydhje në ligamentet e gjurit gjatë miqësores së fundit të Marokut kundër Norvegjisë, ndërsa Aguerd ka probleme në ijë, dëmtim që e pengon të marrë pjesë në Kupën e Botës.
Pas këtyre mungesave, Maroku ka thirrur nga lista rezervë mbrojtësin Marwane Saadane dhe anësorin Amine Sbai.
Maroku do ta nisë aventurën në Botëror të shtunën me një përballje të madhe ndaj Brazilit në “MetLife Stadium”. Më pas, skuadra afrikane do të vazhdojë fazën e grupeve me ndeshjet kundër Skocisë dhe Haitit.
