Didier Deschamps ka dalë në mbrojtje të Kylian Mbappé, pas kritikave të fundit për formën e kapitenit të Francës dhe pozicionin e tij në fushë.
Sulmuesi i Real Madrid nuk po kalon momentin e tij më të mirë, ndërsa paraqitja ndaj Irlandës së Veriut ka ngritur dyshime te një pjesë e tifozëve për nivelin dhe angazhimin e tij. Megjithatë, trajneri i Francës nuk ka dyshime për lojtarin e tij kryesor.
Në një intervistë për The Guardian, Deschamps theksoi se Mbappé mbetet lideri i Francës, si brenda ashtu edhe jashtë fushës.
“Kylian është kapiteni ynë sot. Ai dëgjonte dhe vëzhgonte më parë. Nuk është si Hugo Lloris, nuk ka të njëjtin karakter apo personalitet. Ai e merr këtë rol lidershipi jashtë fushës dhe brenda saj, dhe e di se kur flet, nuk flet vetëm për veten, por në emër të të gjithë lojtarëve”, u shpreh Deschamps.
Trajneri francez iu përgjigj me ironi edhe kritikëve që vënë në dyshim aktivizimin e Mbappé si qendërsulmues.
“Duhet të jem budalla, dhe me siguri kanë qenë shumë trajnerë të paaftë ata që e kanë vendosur Mbappé në qendër të sulmit në skuadrat ku ka luajtur. Gjatë dy viteve të fundit te Real Madrid dhe vitit të fundit te PSG, ai ka luajtur si qendërsulmues. Ka tre vite që luan në atë pozicion”, tha Deschamps.
Një tjetër temë e prekur nga trajneri ishte konkurrenca e madhe në sulmin e Francës. Përveç Mbappé, në skuadër janë edhe lojtarë si Olise, Cherki, Dembélé, Mateta, Marcus Thuram, Barcola, Akliouche dhe Désiré Doué.
Deschamps pranoi se menaxhimi i pakënaqësisë së lojtarëve që nuk do të jenë titullarë do të jetë një nga sfidat më të mëdha gjatë Botërorit.
“Konkurrenca është pjesë e jetës, por kur prek drejtpërdrejt një lojtar, bëhet më e vështirë”, përfundoi trajneri i Francës.
