Rafael Leao ka folur sërish për të ardhmen e tij te Milan, duke lënë të hapur mundësinë e largimit nga “San Siro”.
Në një intervistë për RTP, televizioni portugez që e filmoi në një stadium bosh të “San Siro”, sulmuesi portugez deklaroi se ka arritur atë që dëshironte me fanellën kuqezi.
“Kam arritur tashmë atë që doja të arrija me Milan. Në futboll nuk mund të thuash kurrë kurrë, nuk e di asnjëherë çfarë sjell e ardhmja, por nëse do të ndodhte, do të largohesha shumë i lumtur dhe i kënaqur që kam ndihmuar për ta çuar klubin aty ku meriton të jetë”, u shpreh Leao.
Portugezi u pyet edhe për trajnerët më të mirë që ka pasur në karrierë. Ai përmendi dy emra, duke vendosur Stefano Piolin në krye të listës.
“Do të kisha dashur të punoja më gjatë me Jorge Jesus. Ai ishte një trajner që besoi te unë. Mendoj se ka qenë trajneri më i mirë që kam pasur, pas Stefano Piolit”, tha Leao.
Në intervistë, Leao foli edhe për familjen, një temë shumë e rëndësishme për të.
“Zoti më dha dhuratën që të luaj në një nivel të mirë dhe të ndihmoj familjen time”, deklaroi ai.
Në të njëjtin reportazh foli edhe nëna e tij, e cila kujtoi momentin kur mësoi se Rafa ishte grumbulluar për Kupën e Botës.
“Kur pashë që Rafa ishte thirrur për Botërorin, bërtita”, tha ajo.
Leao do të luajë me Portugalinë në Kupën e Botës, ku do të ketë mundësinë të jetë në të njëjtën skuadër me Cristiano Ronaldon.
“Besoj se fitimi i Kupës së Botës është ëndrra e çdo futbollisti. Nuk ka asgjë më të rëndësishme se të fitosh një kompeticion të madh si Botërori. Cristiano Ronaldo është idhull dhe do të jetë gjithmonë. Ai do të jetë idhull edhe për fëmijët e mi, ashtu siç është edhe për vëllain tim. Është spektakolare të luash me të”, u shpreh Leao.
E ardhmja e tij te Milan mbetet ende e paqartë. Sulmuesi është në merkato, por klubi kuqezi po kalon një fazë ndryshimesh dhe ende nuk është e qartë se kush do të marrë vendimet kryesore për transferimet.
Për momentin, Galatasaray duket klubi më i vendosur për Leao. Turqit i kanë ofruar një kontratë me pagë 10 milionë euro në sezon, por ende nuk kanë nisur bisedimet me Milan. Fenerbahçe, nga ana tjetër, është tërhequr pas interesimit fillestar.
Vendimi për të ardhmen e Rafael Leao pritet të merret pas Kupës së Botës.
