Gjykata e Apelit ka shtyrë dhënien e vendimit për Mario Përlleshajn, autor i vrasjes së 14-vjeçarit Martin Cani, ngjarje e ndodhur në afërsi të shkollës “Fan.S.Noli” në Tiranë, më 18 nëntor 2024.
Raportohet se shkak për shtyrjen e vendimit u bë mungesa e një prej anëtarëve të trupës gjyqësore.
Përlleshaj u dënua me 16 vite heqje lirie në 9 dhjetor të vitit 2025 për vrasjen e Martin Canit dhe tentativën e vrasjes ndaj shokut të tij.
Si ndodhi ngjarja:
Vrasja e Martin Canit ndodhi më 18 nëntor 2024, në Tiranë, rreth 200 metra larg shkollës “Fan Noli”.
Konflikti mes dy adoleshentëve kishte nisur tri ditë para ngjarjes, brenda ambienteve të shkollës për motive të dobëta. Edhe pse në dukje ishte shuar, konflikti u rindez sërish brenda shkollës.
Të dy të miturit u përplasën në tualetet e shkollës gjatë paradites kur ndodhi ngjarja dhe debatuan ashpër, por u ndanë nga roja i sigurisë.
Pas mësimit, të shoqëruar nga miqtë e tyre, ata u takuan pranë shkollës, ku konflikti u përshkallëzua në një përleshje fizike, duke përfunduar me vrasjen e Martinit dhe plagosjen e Luis Meçes.
