Suksesi i Paris Saint-Germain në Champions League ka hapur një debat të madh në futbollin evropian. Skuadra e Luis Enrique fitoi për të dytin vit radhazi trofeun më të rëndësishëm për klube, ndërsa Real Madrid e mbylli sezonin pa titull.
Në Francë, transformimi i PSG shihet si rezultat i një vendimi të fortë: klubi i dha Luis Enrique kontroll të plotë mbi projektin sportiv. Trajneri spanjoll ndërtoi një skuadër më të balancuar, më kolektive dhe më pak të varur nga yjet individualë.
Largimi i Kylian Mbappé konsiderohet si një nga momentet kyçe të këtij ndryshimi. Për vite me radhë, sulmuesi francez ishte fytyra e projektit parizien, por pas largimit të tij, PSG ndërtoi një grup të ri me lojtarë si Vitinha, João Neves dhe Désiré Doué.
Sipas gazetarit Jordi Martí, çelësi i suksesit ishte besimi i plotë që Nasser Al-Khelaifi i dha Luis Enrique. Ai theksoi se disa presidentë klubesh duhet të marrin shënim nga ky model, ku trajnerit i jepet autoritet real për të ndërtuar skuadrën sipas ideve të tij.
Në debat u përmend edhe Real Madrid. Sipas Martí, ndryshe nga PSG, Barcelona apo Atlético Madrid, klubi madrilen nuk u ka dhënë trajnerëve të tij të njëjtën fuqi vendimmarrëse. Ai tha se dhoma e zhveshjes te Real Madrid ka qenë shumë e vështirë për t’u menaxhuar.
Një tjetër element i rëndësishëm i suksesit të PSG është përmendur edhe roli i Luis Campos si drejtor sportiv. Struktura e qartë sportive i ka mundësuar Luis Enrique të punojë pa ndërhyrje dhe të ndërtojë një skuadër që tashmë dominon në Evropë.
Pas dy Champions League radhazi, PSG ka ndryshuar imazhin e saj në futbollin evropian. Nga një klub i kritikuar për varësinë nga yjet, parizienët janë kthyer në një ekip me identitet të fortë dhe projekt të qartë sportiv.
