Kryeministri Edi Rama ka reaguar ndaj debatit publik dhe kritikave që kanë shoqëruar projektin e investimit në Zvërnec, pas përplasjeve dhe kundërshtive të shfaqura së fundmi.
Gjatë fjalës së tij, Rama theksoi se bëhet fjalë për një investim prej 4 miliardë eurosh, duke sqaruar se investitorët nuk janë kompani ndërtimi që ndërtojnë dhe largohen, por pronarë të territorit të blerë me fonde të verifikuara.
Kreu i qeverisë hodhi poshtë pretendimet se investimi lidhet me Izraelin, duke sqaruar se kapitali vjen nga Katari. Ai kritikoi ashpër kundërshtarët e projektit, duke i akuzuar për shpifje dhe dezinformim.
Rama ngriti gjithashtu pikëpyetje mbi mbështetjen që, sipas tij, po marrin protestuesit nga media greke, duke pyetur se si mund të konsiderohen ato aleate në mbrojtjen e mjedisit në Shqipëri.
“Për të investuar 4 miliardë euro, jo si ndërtues që shesin e ikin, si në Tiranë që ndërtojnë pallate dhe nuk marrin dot hipotekën, por si pronarë të terrenit që e kanë blerë me para të mbikëqyrura në mënyrë strikte nga agjencia jonë kundër pastrimit të parave dhe me partnerë ndërkombëtarë, një për një, euro për euro. Dhe jo nga Izraeli, por nga Katari, që nuk besoj se mund të konsiderohet nga ata që i thonë vetes myslimanë dhe vetëm Allah dhe Kuran nuk kanë. Sepse bëjnë çdo ditë krimin e ndaluar nga Kurani për të helmuar njerëzit me shpifje.
Si mund të jem unë kundër jush dhe kundër vetes? Dhe si mund të jenë gazetat e Greqisë aleatët tuaj për mbrojtjen e mjedisit të Shqipërisë, që janë mbushur sot me kauzën tuaj? Ka diçka këtu që nuk shkon? Apo u gjet tradhtari, shitësi i atdheut dhe ai është kryeministri juaj?
Thënë këto, dhe ndjesë nëse jam shumë i drejtpërdrejtë dhe mbase emocional, por kjo është ndjesia ime. Për mua këto janë ditë të habitshme, që për herë të parë më kanë bërë të mendoj që t’ju përulem thellë për nderin e madh që më keni bërë dhe t’ju kërkoj ndjesë për të ikur në katund dhe t’ju lë në duar që do të zgjidhni vetë për ta mbrojtur Shqipërinë nga të huajt.
Por kam zgjedhur të bëj atë që kam bërë gjithmonë, t’ju udhëheq drejt asaj Shqipërie që e dua sa ju dhe siç e doni ju.”
