Egnatia është shpallur kampione e Shqipërisë për të tretin sezon radhazi, pas fitores 2-0 ndaj Dinamo City. Rrogozhinasit bënë detyrën në “Elbasan Arena” dhe siguruan titullin në javën vendimtare të “Final 4”.
Protagonisti i sfidës ishte Albanese, i cili realizoi dy herë brenda pjesës së parë. Fillimisht shënoi nga pika e bardhë në minutën e 29-të, ndërsa dhjetë minuta më vonë gjeti sërish rrjetën për të vulosur rezultatin 2-0.
Dinamo City nuk arriti të reagonte dhe e mbylli fazën finale në vendin e katërt, ndërsa Egnatia ruajti kontrollin e ndeshjes deri në fund.
Në takimin tjetër, të luajtur në “Air Albania”, Elbasani fitoi 2-1 ndaj Vllaznisë, por suksesi nuk mjaftoi për të rrëmbyer titullin. Verdheblutë u ngjitën në të njëjtën kuotë pikësh me Egnatian, por ndeshjet direkte favorizuan rrogozhinasit.
Vllaznia e mbylli sezonin në vendin e tretë, ndërsa Dinamo City në të katërtin, me trofeun e Kupës së Shqipërisë si arritjen kryesore të sezonit.
Rezultatet:
Egnatia 2-0 Dinamo City
Albanese 29’ pen., 39’
Vllaznia 1-2 AF Elbasani
Balaj 49’ / Lajthia 52’, Ibrahim 64’
