Eurojust ka publikuar këtë të mërkurë më 27 maj, detajet nga operacioni i përbashkët mes autoriteteve italiane dhe shqiptare, kundër grupeve të krimit të organizuar të përfshira në trafik ndërkombëtar droge dhe pastrim parash.
Gjatë aksionit të përbashkët të zhvilluar më 26 maj në Itali dhe Shqipëri, u arrestuan 12 persona, ndërsa tre të tjerë morën thirrje zyrtare nga autoritetet. Hetimet lidhen edhe me një vrasje të rëndë të ndodhur në maj të vitit 2025 në rajonin e Barit, Itali.
Sipas autoriteteve italiane, një konflikt në një lokal në zonën e Barit degjeneroi në rrëmbimin dhe vrasjen brutale të një personi në një shpellë të izoluar në zonën Upper Murgia. Hetimet zbuluan se ngjarja kishte lidhje me aktivitete të trafikut të drogës të drejtuara nga një shtetas shqiptar.
Ndërkohë, hetuesit italianë dhe shqiptarë identifikuan një grup të strukturuar kriminal që vepronte në trafikun ndërkombëtar të drogës dhe pastrimin e parave. Sipas dosjes hetimore, rreth 1 milion euro të ardhura nga aktivitetet kriminale janë transferuar nga Italia drejt Shqipërisë përmes një rrjeti kriminal me bazë në Tiranë.
Operacioni u realizua në kuadër të një ekipi të përbashkët hetimor (JIT), të krijuar me mbështetjen e Eurojust mes Prokurorisë së Barit dhe Strukturës së Posaçme Kundër Korrupsionit dhe Krimit të Organizuar (SPAK).
Autoritetet bëjnë me dije se ndaj 15 personave janë ngritur akuza të rënda, përfshirë:
-vrasje me paramendim me metoda mafioze,
-trafik droge,
-tentativë zhvatjeje,
-armëmbajtje pa leje,
-pastrim parash,
-si dhe përkrahje të autorëve të krimit.
Ky është ekipi i pestë i përbashkët hetimor mes Italisë dhe Shqipërisë gjatë viteve 2018–2026 për luftën kundër organizatave kriminale shqiptare që operojnë në trafikun ndërkombëtar të kokainës dhe heroinës.
Sipas Eurojust, bashkëpunimi ndërmjet autoriteteve shqiptare dhe italiane ka çuar deri tani në: më shumë se 170 arrestime, sekuestrimin e mbi 7 tonëve drogë, si dhe dënime deri në 20 vite burg për persona të përfshirë në rrjetet kriminale.
Në operacion morën pjesë: Prokuroria e Barit dhe Drejtoria Antimafia në Itali, SPAK, Policia e Shtetit Shqiptar, si dhe struktura të specializuara hetimore italiane dhe shqiptare.
